نجم الزمالك يتلقى عرضًا صربيًا.. بعد خروجه من حسابات جوميز

أكد الإعلامي خالد الغندور إن سيف فاروق جعفر لاعب وسط الفريق الأول لكرة القدم بنادي الزمالك غاب عن تدريبات الفريق الأبيض خلال اليومين الماضيين.

وأوضح الغندور خلال تقديم برنامجه ستاد المحور، أن سيف جعفر بقاله يومين مش بيروح تدريبات الزمالك.. وزعلان شوية من الموقف اللي هو محطوط فيه.

وواصل: “طبعًا سيف كان بيشارك في التدريبات الفردية مع المستبعدين اللي هما سامسون ومحمد عاطف ومهاب ياسر والمدافع الشاب أحمد رفاعي، سيف كان جايله عرض صربي والزمالك رفضه”.

وكشف الغندور سر رفض العرض الصربي لسيف فاروق جعفر قائلًا: “العرض كان هيبقى إعارة مجانية لمدة موسم والزمالك رحب ولكن بوضع بند شراء بمبلغ مالي كبير والنادي الصربي تحفظ على ذلك وفشل الانتقال”.

وأكمل: “وكان يملك عرض إعارة من غزل المحلة واللاعب رفض يروح المحلة كان في كذا نادي تاني بس الامور مش ماشية”.

واستطرد: “الأزمة أن جوميز يرى إن اللاعب من الأفضل أن يخرج إعارة أو بيع لأنه من الصعب يحصل فرصة.. في نفس الوقت الإدارة لما شافت أن اللاعب ممكن ميخرجش إعارة سجلته في القايمة الأفريقية والمحلية تحسبًا لبقائه، واللاعب زعلان بقى لأن بيتكلم مع الإدارة يقولوله المدرب اللي مش عايزك ويتكلم مع المدرب يقوله الملف مع الإدارة.. والحقيقة إن جوميز هو اللي شايف أن سيف يخرج يلعب أفضل بدل ما يفضل وميخدش أي فرصة للمشاركة”.