عاجل.. أزمة غير متوقعة تضرب جدران الأهلي

الأهلي، أزمة غير متوقعة داخل جدران النادي الأهلي، بطلها الدكتور محمد سراج الدين عضو مجلس إدارة النادي الأهلي، بعد أن أثار جدلًا واسعًا.

بوست بسيط تحول إلى عاصفة داخل القلعة الحمراء، بعدما نشر محمد سراج الدين عضو مجلس إدارة الأهلي، تهنئة لنادي بيراميدز بعد فوزه الليلة على أهلي جدة السعودي، عبر حسابه الشخصي، وهو ما أحدث حالة من الغضب لدى الكابتن محمود الخطيب ومجلس الإدارة، لاعتباره تصرفًا غير منسجم مع سياسات النادي، الضغوط الداخلية دفعت سراج الدين سريعًا إلى حذف التهنئة، قبل أن يصدر بيان اعتذار رسمي لتوضيح موقفه وامتصاص حالة الجدل التي اشتعلت بين الجماهير والإدارة

وقال عضو مجلس إدارة الأهلي في بيانه:

بعتذر عن بوست التهنئة من شوية بس المقصد منه كان بمنتهى حسن النية وربنا الأعلم والمباركة كنت أقصد بها اللاعبين اللي لعبوا بروح عالية ورجولة كلاعبين مصريين (معظم الفريق ) قدام فريق غير مصري ولاعبين أجانب لكن ولا اقصد به تهنئة إدارات ولا غيره ولا في دماغي ولا نيتي ومحصلش ان حد هنأ النادي الأهلي قبل كده عشان أقدمله تهنئة رسمية الموضوع حصل بشكل عفوى  وودي أنا كان ممكن أقول ده الأدمن او غيره اللي كتب لكن أنا بحب المصارحة والمواجهة واحترام الجمهور والأصدقاء قبل كل شئ واساءت التقدير في التهنئة كلنا بشر في النهاية قد نخطأ أو نصيب

وأعتقد أنا معروف موقفي وكان واضح في مواقف سابقة كتير ومتسجل قدام اي توجه ضد النادي من قريب او بعيد وبالعكس البوست ملوش أي علاقة باستمراري في النادي من عدمه لأن مع كل مواقفي السابقة واللي ممكن تكون سببت ضرر ليا بشكل شخصي في أمور معينة عمري ما طلعت وضحت أو تم المتاجرة بهذا الأمر وسببها بيكون غيرتي على النادي زي أي مشجع ومحب للأهلي قبل ما أكون مسؤول بالعكس أنا بكون كده ومقيد بسبب تقاليد المنصب

وبالعكس لو مش مستمر هكون واخد راحتي اكتر في الردود والهجوم عن كده وده هيحصل فعلا لو مش في موقع المسؤولية مستقبلاً ولا هيفرق عندي أجامل حد ولا أكسب حد عشان مش موجود أو مش مكمل الأهلي بيكون هو اللي في دماغي وبس…بعتذر مرة تانية والموضوع حصل بشكل عفوي وكل الإحترام لأي حد زعل أو أضايق من البوست وأهم حاجة ربنا يكرمنا في المبارة القادمة ويستعيد الفريق مكانه المفضل رقم ١ قريباً إن شاء الله