إمام عاشور يعتذر لجماهير الأهلي ويوضح تفاصيل أزمته

سبورت 360- حرص إمام عاشور لاعب وسط النادي الأهلي، على جماهير القلعة الحمراء، كما كشف عن تفاصيل أزمته الأخيرة وغيابه عن رحلة الفريق إلى تنزانيا لمواجهة يانج أفريكانز.

وكتب إمام عاشور عبر حسابه على “انستجرام”: “للأسف كلام كتير مغلوط وغير صحيح بيتردد بخصوص اللي حصل، وأنا متقبل أي قرار ياخده النادي، وواثق أنه المسئولين في الأهلي هيتفهموا موقفي كويس”.

وأضاف: “أنا فعلا عندي دور برد جامد ودرجة حرارتي عالية وتقلبات في المعدة بشكل غير طبيعي، وباخد مضادات حيوية، وللأسف كل أسرتي بتعاني من نفس الأعراض”.

وأكمل: “وأنا بلغت الدكتور أحمد جاب الله بظروفي الصحية وعدم قدرتي على السفر، وده إجراء غير كافي في مثل هذه الأمور، لكن أخطأت بحسن نية وكان المفروض أتواصل مع الكابتن وليد صلاح الدين علشان يبلغ المدير الفني وتتعمل الإجراءات الطبية المتبعة عند التخلف عن السفر”.

واستطرد” “الموضوع اتقفل خلاص، وتواصلت امبارح بالليل مع الكابتن وليد صلاح الدين، وأنا تحت أمر النادي، وجمهور الأهلي سندي وضهري بعد ربنا سبحانه وتعالى”.

وتابع: “وبعتذر للنادي والجهاز الفني وزمايلي وقبلهم جمهور الأهلي، أنا فخور باللعب في أكبر نادي في أفريقيا، وعلاقتي بجماهيره العظيمة لا تقبل القسمة على اتنين، وأرجو من الجميع إغلاق هذا الموضوع، والناس اللي بتقول ان إمام عايز يلوي دراع النادي بقولهم حسبي الله ونعم الوكيل”.

وأردف: “محدش يقدر يلوي دراع الأهلي، ولا يمكن أفكر بالطريقة دي أبدا، وأنا اتشرفت بارتداء الفائلة الحمراء وبقالي 3 سنين في النادي، والحمد لله عمري ما قصرت لا في حق النادي ولا جماهيره، وده حقهم عليا”.

واختتم: “ووجودي في الأهلي نادي القرن وفي ضهري جمهور الأهلي يعوضني عن كل حاجة.. عندنا ماتش بكره مهم. يارب كل التوفيق لزمايلي والجهاز الفني ونحقق الفوز اللي يسعد كل الأهلاوية”.